Eid ul azha dusra badda islami tehwaar hai jo har saal islami mahiney zil’hajj ki das tareekh ko manaya jata hai. Eid ul azha ke laghwi ma’ani “qurbani ki eid” ke hein, kyun ke is rooz Hazart Ibraheem khaleel ullah ki qurbani ki yaad taza karne ke liye janwar zibah kiye jate hein. Hazart Ibraheem khaleel ullah jo Allah talla ke jallel ul qadar peghamber the, unhein aik rooz khwaab mein qurbani dene ka hukam diya gya.
Ambiya kraam ke khwaab chunke aam tor par hakikat par mabni hote hein is liye ap ne subah sawery uth ker Allah ki rah mein soo (100) oonth qurban ker diye. Us daur mein oonth maal o dolat mein shumaar hote the aur bohut keemati cheez tasawur kiye jate the. Dusari raat phir qurbani ka hukam hua to ap ne subah ko phir soo (100) oonth Allah ki rah mein qurban ker diye. Lakin teesari raat phir hukam hua ke apni sab se keemati aur pyari cheez Allah ki rah mein qurban kro.
Hazart Ibraheem (a.s) subah ko kaafi gor o fikar ke baad is natijey par pohonche ke apne lakhtey jigar Hazart Isma’eel (a.s) se badh ker mujhe aur kya cheez pyari ho sakti hai. Chunancha ap ne Hazart Isma’eel (a.s) se apna khwaab bayan kiya. Farmaberdaar batey ne forran jwab diya ke ap Allah talla ke hukam ki tameel mein takheer na krein. Mujhe ap is imtihaan mein sabit qadam paein ge. Allama Iqbal ne is moqa ke munasbat se kya khobsurat shayar kaha hai:
Ye fezaan e nazar tha ya ke muktab ki karamat thi
Sikhaaye kis ne Isma’eel ko adaab e farzandi
Hazart Ibraheem (a.s) baitey ko sath le ker jungle ki taraf rawana huye. Shetaan ne Hazart Isma’eel ke dill mein bohut se waswasy dalne ki koshish ki lakin unke paye istaqlaal mein laghzish na ane pai. Balke unhon ne apne baap se araz kiya ke hum dono ko apni ankhon per patiyan bhand leni chahiyein taake shafqat prdi is farizey ki adaigi mein ha’il na hone paye. Hazart Ibraheem(a.s) ne aisa hi kiya lakin Allah talla ko apne pyarey peghamber ka siraf imtehaan maqsood tha.
Mazeed parhein: Eid ul Azha
Allah talla ke hukam se farishtey ne Hazart Isma’eel(a.s) ki jaga aik dunba pohoncha diya aur Hazart Isma’eel (a.s) ka baal bhi beeka na hone paya. Ye waqiya Allah talla ki ataat aur farmaberdaari ka aik aisa manzar pesh kerta hai ke jis ki misaal tareekh e aalim pesh karne se qasir hai. Yehi waja hai ke is azeem qurbani ki yaad taza karne ke liye eid ul azha ke mooqa par qurbani dena musalmanon ke liye sunat e Ibraheemi karar de diya gya. Isi liye is eid ko eid e qurbani bhi kaha jata hai. Allah talla ko Hazart Ibraheem (a.s) aur Hazart Isma’eel (a.s) ki ye ada is qadar pasand i ke is amal ko har saal dohraney ka hukam diya chunancha eid se aik rooz pehle makka mukerma mein hajj ke liye tamaam duniya bhar se aye huye farzandaan toheed e hajj ke baad janwaron ki qurbani dete hein aur un ki paerwi mein har sahib e istataat musalman gaye, beel, oonth aur bakrey dunbey ki qurbani deta hai.
Islami shariyat ke roh se sab se afzal qurbani dunbay ki hai. Bakrey, oonth, gaye aur bael wagera ki qurabni bhi jaiz hai. Oonth, gaye aur beel ki qurbani saat afraad mil ker de sakte hein. Qurbani ki ye takreeb 12 zilhajj tak jari rehti hai. Hukam hai ke qurbani ke gosht ke teen baraber hisey kiye jaein. Aik hisa apne liye, dusra hisa rishtedaron ke liye aur teesra hisa masakeen ke liye hota hai. Is terhan gareeb se gareeb shakhs bhi qurbani ke gosht se mehroom nhi rehta. Aur sab loog eid ki khushiyon mein shareek hote hein. Is amal se hakook Allah aur hakook ul ibaad dono ki takmeel ho jati hai. Dar’r hakikat qurbani ki asal rooh takwaa hai. Allah talla ka irshaad hai:
“Allah talla ko un janwaron ka gosht aur khoon hargiz nahi pohonchta balke usko tumhari janib se tumhara takwaa pohonchta hai.”
Mazeed parhein: Eid UL Fitar ke fazayil
Eid ul azha ke rooz loog subah subah gusal ker ke eid gah mein jane ki taiyaariyon mein masroof ho jate hein. Bache, jwaan, buddey sab apni apni istata’at ke mtabik naye aur saaf suthrey kaprey zeb tan kerte hein. Qurbani ke janwaron ko sajatey hein aur phir eid perhne ke liye eid gah ki taraf rawana ho jate hein kyun ke eid bahir khule medaan mein perhane ka hukam hai. Eid gah ka nazara bhi qabil e deed hota hai aur dor dor tak loog saff bandi kiye bethey hote hein. Imaam sahib khutba sunatey hein. Eid ke mutalik islami ehkamaat bayan kerte hein.
Phir sab loog eid ki namaz ke liye kharey ho jatey hein. Imaam sahib do rakaat namaaz ada kerte hein aur khutba perhate hein. Khutbey ke baad loog apne dost, ahbaab se eid milte hein aur phir jaldi jaldi gharon ka rukh kerte hein taake janwaron ki qurbani di jaye. Yun baki ka sara din janwaron ko zibah kerne ke intazamaat aur dost ahbaab aur gareebon maskeenon mein gosht ki takseem karte huye guzar jata hai.
Eid ul azha ka tehwaar hamein ataat e khudawandi ka daras deta hai. Is amal se hamarey ander esaar aur qurbani ka johar paedda kerna maqsood tha. Qurbani ke gosht ko azeezon, rishtadaron aur gareeb maskeenon mein takseem kerne se khuda ki khushnudi ke ilawa zaroorat mandon aur azeezon ke hakook ka ehsaas hota hai aur yun hakook Allah ke sath sath hakook ul ibaad ki bhi takmeel hoti hai.
Lakin afsoos ka mukam ye hai ke aaj qurbani ke asal maqsad aur us ki asal rooh ko faramosh ker chuke hein. Hamarey is amal mein jo khalistan Allah ki raza aur khush nodi ke liye hona chahiye, khaloos ki bajay dikhawa aur numaish aa gai hai. Qeemati se qeemati janwar le ker zibah kiye jate hein lakin loogon ko apni amarat aur shaan o shoqat dikhane ke liye.
Gosht ya to kai kai dinon ke liye farijon mein mehfooz ker liya jata hai ya phir asey asey jan’ne walon ko diya jata hai jahan se tehseen o tareef ki umeed ho ya phir jin loogon se koi garz ya kam wabasta ho. Goya qurbani ab sirf aur sirf numaish ban ker reh gai hai halanke eid ul azha par qurbani ka maqsad Allah talla ki khushnudi ke alawa dillon mein aik dusrey ke liye khaloos aur qurbani ka jazba paidda kerna hai, wo bhi waqti tor par nahi balke saal ke baki hisey mein bhi isi qurbani, esaar aur khaloos ka muzahira hona chahiye.
Leave a Reply